Prokurori i Shtetit në Kosovë pa ndalime për vepra penale kundër të drejtave të votimit

Prokurori i Shtetit ka bërë të ditur se deri në përfundim të procesit të votimit nuk është ndaluar asnjë person për vepra penale kundër të drejtave të votimit.

Sipas njoftimit zyrtar, rreth 100 prokurorë dhe pjesëtarë të personelit të sistemit prokurorial kanë qenë të angazhuar gjatë ditës së zgjedhjeve, me qëllim të sigurimit të mbarëvajtjes së procesit zgjedhor.

Gjatë ditës, Prokurori i Shtetit ka pranuar disa informata të cilat, pas verifikimit dhe trajtimit, kanë rezultuar se pesë raste përmbanin elemente të veprave penale kundër të drejtave të votimit. Të gjitha rastet janë iniciuar, por të dyshuarit janë liruar në procedurë të rregullt me vendim të prokurorit.

Rastet janë regjistruar në këto lokalitete:

Ranillug – Gjilan, për veprën penale “Cenimi i përcaktimit të lirë të votuesve” (neni 210 i Kodit Penal të Kosovës);

Zhegër – Gjilan, për veprat penale “Pengim i procesit të votimit” dhe “Cenimi i fshehtësisë së votimit” (nenet 214 dhe 215);

Prizren, për veprën penale “Asgjësimi i dokumenteve të votimit” (neni 217);

Drenas, për veprën penale “Cenimi i fshehtësisë së votimit” (neni 215);

Suharekë, për veprën penale “Cenimi i fshehtësisë së votimit” (neni 215).

Prokurorët e shtetit do të vazhdojnë kujdestarinë edhe gjatë fazës së numërimit të votave në vendvotime dhe gjatë dërgimit të tyre në qendrat komunale të numërimit.

Në fund, Zyra e Kryeprokurorit të Shtetit ka falënderuar qytetarët, mediat dhe shoqërinë civile për bashkëpunimin e treguar, duke theksuar rëndësinë e parandalimit dhe ndjekjes efektive të veprave penale që lidhen me procesin zgjedhor.