Protesta e serbëve, mbyllet pika kufitare në Jarinjë

Kjo protestë nga serbët është thirrur si formë kundërshtimi ndaj vendimit të Republikës së Kosovës për të nisur zbatimi i dy ligjeve, atij për të Huajt e për Automjete

Në pikën kufitare në Jarinjë në anën e Serbisë ka nisur protesta e thirrur nga serbët, mirëpo aty shihet një numër i vogël protestuesish.

Për këtë arsye është mbyllur qarkullimi i veturave në këtë pikë kufitare për orët sa është planifikuar të zgjasë kjo protestë, transmeton albinfo.ch.

Kjo protestë nga serbët është thirrur si formë kundërshtimi ndaj vendimit të Republikës së Kosovës për të nisur zbatimi i dy ligjeve, atij për të Huajt e për Automjete.

Për këtë çështje një ditë më parë institucionet u bënë thirrje shtetasve kosovarë që të shmangin këtë pikë kufitare.

Gjithsesi, në mëngjesin e së shtunës, Qeveria e Kosovës është pajtuar që, duke nisur nga e diela, zbatimi i Ligjit për të huajt dhe i atij për automjete të fillojë me lehtësira. Me kërkesë direkte nga Bashkimi Evropian, i cili për këtë çështje e dërgoi në Kosovë emisarin e posaçëm për dialogun, Peter Sorensen, Kosova u pajtua që t’u lëshojë leje qëndrimi 12-mujore studentëve serbë që nuk kanë dokumente të Kosovës dhe t’i pranojë dokumentet e identifikimit të lëshuara nga strukturat ilegale, edhe për tre muaj.

---