Protestuesit në tenda, deri në rrëzimin e Gruevskit

Protestuesit vazhduan mënyrën tjetër të demonstrimit, duke u vendosur nëpër tenda. Ata thonë se do të qëndrojnë aty, deri në dorëheqjen e kryeministrit Nikolla Gruevski

Protesta masovike e opozitës u ndërpre në orën 19, ndërsa një numër i konsiderueshëm i protestuesve vazhduan mënyrën tjetër të demonstrimit, duke u vendosur nëpër tenda para objektit të qeverisë. Ata deklaruan se do qëndrojnë aty, deri në dorëheqjen e kryeministrit Nikolla Gruevski dhe kabinetit të tij.

Siç raportojnë burime nga Shkupi, turma e madhe u shpërnda e qetë, ndërsa disa kamionë dhe furgonë sollën në bulevard mijëra shtretër, thasë për fjetje dhe tenda për fazën e dytë të protestës së vazhdueshme.

Ndërkohë, kryeministri Gruevski jo që ka ka lëshuar pe, por ka paralajmëruar një kundërprotestë për të hënën. Nuk është saktësuar ora, por vendi është i njëjti me atë të protestës së sotme, në qendër të Shkupit. Kjo tregon, se situata në Maqedoni vazhdon të jetë e tendosur.

Në anën tjetër, në protestën e sotme të opozitës kanë marrë pjesë më shumë se 100 mijë protestues, të cilët kërkuan dorëheqjen e kryeministrit Gruevski. Përveç liderëve polikë opozitarë nga tabori maqedonas, në demonstratën e sotme morën pjesë edhe analistë e diplomatë ndërkombëtarë.

Protesta e organizuar nga opozita ishte e para në Maqedoni, në të cilën marrin pjesë, shqiptarë, maqedonas, turq e të tjerë bashkë. Të gjithë së bashku kërkuan dorëheqjen e qeverisë VMRO-BDI.

Ndryshe, dorëheqjen e qeverisë e ka kërkuar edhe Ermira Mehmeti, deputete e partisë në koalicion BDI. Ajo nga SHBA-të, përmes një postimi një facebook ka kërkuar dorëheqjen e qeverisë e cila, sipas saj, nuk tregoi asnjë respekt për parimet e bashkëqeverisjes etnike. “Mjaft ishte. As qytetarët dhe as komuniteti ndërkombëtar nuk mbështet qeverisjen jodemokratike. Është koha për dorëheqje”, është shprehur Mehmeti, sipas të cilës, “pa ndalur e luftoi realizimin e Marrëveshjes se Ohrit”.