Pse zviceranët shpenzojnë shumë kur bëhet fjalë për dhuratat e Krishtlindjeve?

Zvicra ka nga të ardhurat më të larta për frymë në botë. Por sa nga këto para shpenzohen për dhuratat e Krishtlindjeve?

Duke pasur parasysh se zviceranët janë të kursyer edhe në kohët më të mira, dhe se kostoja e jetesës (inflacioni, si dhe qiratë më të larta dhe normat e sigurimit shëndetësor) në vend është rritur, a do të jenë njerëzit në humorin e blerjeve për Krishtlindje?

Dhe nëse po, sa do të shpenzojnë për dhurata?

E vetmja pikë referimi që kemi në këtë pikë është sezoni i festave të vitit 2022 ose, më mirë, katër javët e fundit të dhjetorit.

Edhe pse norma e inflacionit në atë kohë (2.8 për qind) ishte më e lartë se sa është aktualisht (nën 2 për qind), dhe për rrjedhojë shumë mallra të konsumit ishin më të shtrenjta, njerëzit në Zvicër gjithsesi arritën të futeshin në frymën e festave – edhe në aspektin e blerjeve.

Sipas të dhënave nga firma e auditimit dhe konsulencës Ernst and Young (EY), 343 franga për frymë janë shpenzuar për dhuratat e Krishtlindjeve – një rritje prej 3 për qind krahasuar me vitin e kaluar.

Kjo mund të mos duket shumë, por krahasojeni me Gjermaninë fqinje, ku ‘vetëm’ 250 euro (237 franga) për frymë shkojnë për dhuratat e Krishtlindjeve – dy euro më pak se një vit më parë, sipas EY.

Po për sezonin e Krishtlindjeve të këtij viti?

Është shumë herët për të ditur se sa do të shpenzohen për dhurata, pasi dhjetori sapo ka filluar dhe shumë njerëz i shtyjnë blerjet e tyre deri në fund të muajit.

Megjithatë, bazuar në shifrat e shitjes me pakicë nga e Premtja e Zezë (24 Nëntor), e cila shpesh shihet si pararendëse e blerjeve të Krishtlindjeve, sezoni ka nisur me bujë.

Konsumatorët zviceranë shpenzuan 490 milionë franga në 24 orë, 10 milionë franga më shumë se një vit më parë.

Sipas projektit të Monitorimit të Konsumit në Universitetin e St. Gallenit, edhe këtë vit, “kurba e konsumit” në Zvicër po rritet ndjeshëm.

Blerje ‘iracionale’?

Duke marrë parasysh barrën financiare me të cilën përballen shumë familje në Zvicër, pse njerëzit vazhdojnë të shpenzojnë kaq shumë për dhuratat e Krishtlindjeve?

“Kushdo që shikon sjelljen e konsumatorit duke përdorur modele tradicionale ekonomike, me siguri nuk kupton më asgjë”, tha psikologu ekonomik Christian Fichter për platformën e lajmeve Watson.

Ai tha se edhe pse kjo ‘ethet e blerjes’ mund të jetë “iracionale”, ka mënyra për ta shpjeguar atë.

“Së pari, gjendja në tregun e punës është e mirë dhe kuletat janë plot. Ky është gjithmonë faktori më i rëndësishëm në vendimet për blerje”, tha ai.

“Së dyti, nevojat tona për konsum mbeten pavarësisht atmosferës së krizës. Dhe gjithsesi Krishtlindjet janë të shenjta për ne”.

 

 

 

 

 

---