Pse Zvicra po i shtrëngon kontrollet në kufijtë e saj?

albinfo.ch

Si pjesë e zonës Shengen “pa kufij”, në kufijtë zviceranë kryhen vetëm kontrolle sporadike dhe të rastësishme. Por kjo qasje e butë pritet të ndryshojë.

Në mocione identike, të dy dhomat e Parlamentit – Këshilli Kombëtar dhe Këshilli i Shteteve – i kanë bërë thirrje Këshillit Federal të intensifikojë kontrollet në kufijtë zviceranë, me qëllim gjetjen dhe dëbimin e vazhdueshëm të personave pa leje qëndrimi, si dhe frenimin e krimit ndërkufitar.

Në përgjigje, Zyra Federale për Doganat dhe Mbrojtjen Kufitare (BAZG) po vendos 300 punonjës shtesë në kufijtë e Zvicrës.

“Kjo do të sigurojë një prani dhe mbikëqyrje minimalisht të shtuar në vendet që lidhen me migracionin, tha qeveria.

Ajo shtoi se fokusi fillestar i kësaj mase të re “do të jetë në kufirin jugor” – domethënë, në pikat e kontrollit përgjatë kufirit me Italinë, përmes të cilave shumica e migrantëve përpiqen të hyjnë në Zvicër, shkruan thelocal, përcjell albinfo.ch.

A do ta ngadalësojnë këto kontrolle më sistematike trafikun turistik, si dhe rrjedhën e punëtorëve ndërkufitarë në Zvicër?

Sipas autoriteteve federale, kontrollet e shtuara, veçanërisht në kufirin jugor, do të kenë në mënyrë të pashmangshme pasoja negative për trafikun kufitar në tërësi.

Megjithatë, pavarësisht kontrolleve të intensifikuara, “trafiku ndërkufitar i pasagjerëve dhe tregtisë, i cili është kaq i rëndësishëm për Zvicrën, duhet të ruhet sa më shumë që të jetë e mundur”, thanë ata.