Pula, mishi më i preferuar i zviceranëve

pixabay

Ndërsa konsumi i mishit të derrit bie dhe ai i mishit të viçit mbetet i qëndrueshëm, pula po njoh rritje të jashtëzakonshme në Zvicër. Në vitin 2024, çdo banor konsumoi mesatarisht 15.9 kg pulë, një rritje prej 73% krahasuar me vitin 2000.

Rritja e popullaritetit të pulës reflektohet edhe në fast food, ku ajo përbën një të tretën e burgerëve të shitur në McDonald’s, dhe praninë e fortë të markave si KFC dhe Popeyes. Kompani zvicerane si Crrsp po shfrytëzojnë këtë trend, duke shërbyer kryesisht pula në restorantet e tyre dhe duke regjistruar rritje të konsiderueshme të të ardhurave, transmeton albinfo.ch.

Edhe kuzhina e lartë po i kushton më shumë vëmendje pulës. Në restorantin Le Chasseur në Fribourg, kuzhinieri Pierre-Pascal Clément përdor pjesë të ndryshme të pulës, duke e bërë atë një produkt gastronomik tërheqës dhe më të qëndrueshëm.

Rritja e konsumit të pulës ofron mundësi për fermerët zviceranë, të cilët mund të përfitojnë ekonomikisht duke rritur pulë në mënyrë të qëndrueshme. Megjithatë, një e treta e pulës së konsumuar në Zvicër vijon të vijë nga importi, kryesisht nga Brazili.