Punëtorët shëndetësorë paralajmërojnë grevë, ose rritje pagash për 30 %

Në rast se Qeveria e Kosovës nuk do t’i rrisë pagat prej 30 për qind, ashtu siç ka premtuar gjatë fushatës elektorale, punëtorët shëndetësorë do të hyjnë në grevë

Punëtorët shëndetësorë në Kosovë i kanë dërguar sinjal kryeministrit Ramush Haradinaj se do të hyjnë në grevë të përgjithshme nëse nuk i rritë pagat e mantelbardhëve, ashtu siç kanë premtuar gjatë fushatës. Sipas sindikatës së Shëndetësisë, në fillim të muaji shkurt Shëndetësia do të hyj në kolaps në rast të mosreflektimit nga ana e Qeverisë.

Kështu bëri të ditur Blerim Syla, kryetar i Federatës  Sindikale të Shëndetësisë së Kosovës.

“Ne e kemi pasur një marrëveshje të nënshkruar para zgjedhjeve ku është premtuar 30 për qind e rritjes së pagave dhe fillimi i pagesës për kujdestari. Ky është premtim i nënshkruar, nuk është vetëm gojor –atëherë ata janë Qeveria edhe mund të mos e mbajnë premtimin, por kjo i bien qe ata po i legalizojnë premtimet gënjeshtra gjatë fushatës elektorale”, tha Syla.

Ai tha se si sindikatë janë për  dialog, por, sipas tij, qeveritarët nuk po e dëshirojnë një gjë të tillë, citon RTK.

“Kam frikë se do të vjen deri të paralizimi i të gjitha institucioneve nëse nuk  vazhdohet me këtë neglizhencë. Ne jemi për paqe sociale, por si duket dikujt nuk po i intereson paqja sociale”, shprehet ai, transmeton albinfo.ch.

Përfaqësues të Sindikatës së Shëndetësisë, kanë zhvilluar takime me ministrin e Shëndetësisë, Uran Ismaili, ku kanë konfirmuar edhe një herë kërkesat e punëtorëve shëndetësorë, e që janë: ligji i pagave, të shtyhet procesi i ri licencimit për punëtorët shëndetësorë si dhe rritja e pagave prej 30  për qind, ka thënë Syla.