Qeveria e Kosovës ka marrë vendim për rritje pagash në sektorin publik

Rritja e pagave do të nis nga 1 janari i këtij viti, në bazë të vendimit të qeverisë në dorëheqje

Kryeministri i Kosovës në dorëheqje, Hashim Thaçi, në mbledhjen e sotme të qeverisë ka marrë vendim për rritje pagash në sektorin publik dhe ka hedhur poshtë akuzat se kjo rritje është fushatë zgjedhore.

Financimi i rritjes së pagave për kategoritë që paguhen nga buxheti i Kosovës, do të bëhet nga kursimet, të cilat nuk e cenojnë funksionalitetin e shtetit, ka thënë Ahmet Shala, ministër në dorëheqje i Ekonomisë dhe Financave.

Sipas Shalës, rritja e pagave kap shumën prej 100 milionë eurosh. Ai ka thënë se ekzistojnë mundësitë për kursime dhe ato mundësi janë evidencuar gjatë vitit 2010.

Edhe familjet e dëshmorëve dhe invalidët e luftës do të marrin pagat me ngritje prej 50 përqindësh, Policia e Kosovës 40 për qind, shërbyesit civilë 30 për qind, zyrtarët doganorë 30 për qind, punëtorët shëndetësorë 30 për qind dhe zjarrfikësit 30 për qind.

Në rritjen e pagave janë perfshirë mësimdhënësit parauniversitarë të cilët do të marrin 50 për qind më shumë sesa pagat aktuale.