Qeveria e re teknike, zgjidhje për Maqedoninë

Për të dal nga kriza, ndërkombëtarët kanë parashikuar dy mundësi për Maqedoninë: zhbërjen e vendimit për falje nga presidentit Gjorgje Ivanov dhe krijimin e një qeverie të re teknike

Kriza politike në Maqedoni po vazhdon të thellohet edhe më shumë, sidomos pas bojkotit për zgjedhje të shumicës së partive politike. Për të dal nga kriza, përfaqësuesit e bashkësisë ndërkombëtare kanë parashikuar dy mundësi: zhbërjen e vendimit për falje nga presidentit Gjorgje Ivanov dhe krijimin e një qeverie të re teknike.

INA nga burime diplomatike, mëson se duke qenë se sonte skadon afati për dorëzimin e listave për zgjedhjet e 5 qershorit, dhe këtë nuk do ta bëjë asnjë parti politike, Parlamenti menjëherë duhet të informohet nga Komisioni Shtetëror i Zgjedhjeve, për bojkotin nga shumica e partive politike maqedonase.

Në zgjedhjet parlamentare të 5 qershorit në Maqedoni do të merr pjesë vetëm VMRO DPMNE-ja dhe dy parti minore të afërta me partinë e Nikolla Gruevskit. Kjo parti ka qenë e vetmja e cila ka dorëzuar listat me kandidatët për deputet brenda afatit ligjor, që është mbyllur të mërkurën në mesnatë.

Partitë tjera kryesore, Lidhja Social Demokrate e opozitës, si dhe dy partitë shqiptare, BDI dhe PDSH, ashtu edhe siç kishin deklaruar më parë, nuk kanë paraqitur kandidaturat e tyre, me çka edhe kanë verifikuar qëndrimin e tyre për bojkotin e zgjedhjeve, raporton REL.

Shkas për një vendim të tillë është mospërmbushja e kushteve, si ai për anulimin e vendimit të presidentit për faljen e zyrtarëve që po hetoheshin nga prokuroria speciale për vepra të rënda penale, pastrimi i listës zgjedhore dhe kushte tjera që kërkohen edhe nga bashkësia ndërkombëtare për të pasur zgjedhje të lira dhe demokratike.

Ndryshe, nga VMRO-ja kanë thënë se me vendimin për pjesëmarrje në zgjedhjet më 5 qershor, respektojnë kushtetutën e vendit.

Dy partitë shqiptare, BDI dhe PDSH, thonë se pjesëmarrja e tyre në zgjedhje varet nga krijimi i kushteve dhe pjesëmarrja në to e të gjitha partive politike. Për të ndihmuar gjetjen e një zgjidhjeje për dalje nga kriza e thellë, sot në Shkup ka ardhur i dërguari gjerman, diplomati Johannes Haindl.