Qeveria federale pret 30,000 kërkesa për azil këtë vit

(KEYSTONE/Christian Beutler)

Qeveria federale pret që numri i njerëzve që kërkojnë azil në vitin 2024 vështirë se do të ndryshojë në krahasim me vitin e kaluar, teksa u tha se faktorë të ndryshëm ndikues janë vendimtar për këtë.

Sekretariati Shtetëror për Migracionin (SEM) supozon se numri i kërkesave të reja për azil këtë vit do të jetë të paktën aq i lartë sa në vitin 2023.

“Skenari më i mundshëm pret 30,000 (+/- 3,000) aplikime të reja për azil”, thuhet në njoftim, transmeton albinfo.ch.

Përvoja tregon se niveli i pikut arrihet në verë ose në fillim të vjeshtës.

Faktorët ndikues

“Numri i pritshëm i kërkesave të reja për azil në vitin 2024 varet kryesisht nga mënyra se si zhvillohet migrimi nga Turqia në Greqi dhe Bullgari dhe migrimi i mëtejshëm drejt Evropës Perëndimore”, shkruan SEM. Po aq i rëndësishëm është edhe zhvillimi i migrimit nëpër Mesdheun qendror, përcjell 20minuten.

Faktorë të tjerë ndikues përfshijnë shtrirjen e migrimit nga ato vende, qytetarët e të cilëve mund të hyjnë në zonën Shengen pa vizë, si dhe masat e kontrollit kufitar të vendeve fqinje të Zvicrës.

Aplikimet e reja për statusin e mbrojtjes S

Sipas parashikimeve, numri i aplikimeve të reja për statusin e mbrojtjes S për njerëzit nga Ukraina ka të ngjarë të jetë rreth 25,000 (+/-5000) në vitin 2024, me kusht që intensiteti i luftës në Ukrainë të mos ndryshojë ndjeshëm. Në muajt e fundit, numri i personave me status të mbrojtjes S që janë larguar nga Zvicra ka qenë afërsisht i njëjtë me numrin e atyre që kanë aplikuar për statusin S.

“Situata rreth atyre që kërkojnë mbrojtje nga Ukraina tani është qetësuar disi, por ajo vazhdon të paraqesë sfida për qeverinë federale, kantonet, qytetet dhe komunat”, thuhet në njoftim.