Qeveria ofron 300 milionë franga për “Verdingkinder”

Shuma e propozuar nuk i plotëson kërkesat e iniciativës, sipas të cilës duhet të jepen 500 milionë franga për këtë destinim

Kërkesa e personave të trajtuar në kushte diskriminimi, të quajtur Verdingkinder për kompensimin e dëmit të pësuar, ka marrë vetëm përgjigje të pjesshme nga autoritetet e Zvicrës.

Këshilli Federal ka vendosur që atyre (rreth 20 mijë veta) në emër të dëmshpërblimit t`u lë në dispozicion një fond prej 250 dhe 300 milionë franga. Me këtë veprim, qeveria e vendit synon të bëjë një kundërpropozim indirekt për iniciativën e zhdëmtimit për të cilën do të votojnë zviceranet në nivel vendi.

Por shuma e propozuar nuk i plotëson kërkesat e iniciativës së përmendur Verdingkinder, sipas të cilës duhet të jepen 500 milionë franga për këtë destinim.

Nga ana tjetër, Këshilli Federal në kundërpropozimin e bërë, kërkon që padrejtësia e bërë ndaj kësaj kategorie njerëzish të njihet ligjërisht.

Me fenomenin Verdingkinder nënkuptohen masat e veçanta që janë marrë ndaj fëmijëve të familjeve të etiketuara si të papërgjegjshme. Këta fëmijë, deri nga fundi i viteve 60` të shekullit të kaluar shteti ua ka lënë në përkujdesje familjeve bujqësore, të cilat në shumë raste i kanë diskriminuar dhe keqtrajtuar ata.