Qytetarë e udhëheqës institucionalë bëjnë homazhe në Prekaz

Qindra qytetarë të Kosovës, por edhe udhëheqës institucionesh kanë vizituar Prekazin, për të nderuar sakrificën e komandantit Adem Jashari dhe familjes së tij.

Heroizmi i familjes është çmuar lart dhe është vlerësuar kthesë për lirinë dhe pavarësinë e Kosovës. Pas homazheve, kryeministri i Kosovës, Ramush Haradinaj, ka vizituar kullën e Jasharëve dhe është pritur nga Rifat Jashari, vëllai i komandantit.

Ai ka kërkuar nga të gjithë të punojnë për avancim të shtetit dhe ushtrisë.

Më 5, 6 dhe 7 mars të vitit 1998 është zhvilluar njëra ndër betejat më të rëndësishme të Ushtrisë Çlirimtare të Kosovës.

Ajo kulmoi me sulmin e forcave të armatosura serbe mbi familjen Jashari, ku u vranë 55 persona, më shumë se 20 prej tyre ishin fëmijë dhe gra.