Rama flet pas takimit joformal të liderëve të Ballkanit, ja çfarë tha për mungesën e Kurtit

Kryeministri i Shqipërisë Edi Rama është paraqitur në një konferencë për media pas takimit informal në Tiranë me liderë të Ballkanit Perëndimor dhe zyrtarë evropianë.

Në këtë takim ku mungoi kryeministri i Kosovës Albin Kurti e pashmangshme ishte pyetja për mospjesëmarrjen e tij.

Por përgjigja e Ramës ishte shumë e shkurtë në këtë temë.

“Nuk shoh asnjë interes. Të gjithë ishin të ftuar dhe kush deshi erdhi, kush nuk deshi nuk erdhi”, tha Rama.

Ai foli mes tjerash për Planin e Ri të mbështetjes financiare dhe ekonomike të BE-së për Ballkanin Perëndimor, transmeton albinfo.ch.

“Nuk mund të flasim për gjëra konkrete sepse ky plan është në diskutim. Jemi shumë herët për të diskutuar sesa dhe përse një vend ose një vend tjetër do të marrë. Ajo që është e rëndësishme është që ta shikojmë rajonin si një i tërë dhe të punojmë për rajonin si një i tërë edhe pse brenda rajonit ka vende që janë përpara në procesin e integrimit”, theksoi Rama.