Rama flet për turizmin në rritje, pavarësisht krizës

Krahas letrave për Lulzim Bashën, kryeministrit Edi Rama nuk i ka munguar fokusi ndaj sezonit të ri turistik, i nisur tashmë në disa qytete të vendit.

Nga Shkolla Profesionale Hoteleri-Turizëm në Tiranë, që përgatit afro 1000 nxënës çdo vit, kryeministri Edi Rama u shpreh edhe për ndikimet që sjell situata politike në vend, në raport me një prej muskujve kryesorë të ekonomisë shqiptare, turizmin.

“Pavarësisht situatave që po ndodhin, përsëri numri i turistëve duket se vazhdon të rritet dhe nga hyrjet që kemi parë tani në muajin maj jemi më lart se vjet. Mirëpo kjo e gjitha kërkon kualifikim të madh”, tha kryeministri Rama, shkruan TCH, përcjell Albinfo.ch.

Me investimet e kryera në këtë shkollë me vlerë 272 milionë lekësh, nga buxheti i shtetit, synohet rritja e numrit të nxënësve që ndjekin këtë shkollë, si dhe realizimi i procesit mësimor vetëm paradite.