Ramazani, obligim i çdo myslimani

Bashkësisë Islame të Kosovës i ka bërë të gjitha përgatitjet e nevojshme për muajin e Ramazanit, deklaroi Resul Rexhepi, sekretar i BIK-ut

Çdo besimtar mysliman, i cili është i moshës madhore dhe i shëndosh, e ka obligim ta agjërojë muajin e shenjtë të Ramazanit. Kështu ka deklaruar sekretari i përgjithshëm i Bashkësisë Islame të Kosovës (BIK), Resul Rexhepi, i cili gjithashtu njoftoi se projekti për xhaminë e madhe në Prishtinë është në finalizim.

Rexhepi ka bërë me dije se BIK-u i ka bërë të gjitha përgatitjet e nevojshme për Ramazanin.

“Ne si BIK, nëpërmjet Shoqatës ‘Bereqeti’, falë Zotit dhe donatorëve, sivjet jemi më të përgatitur se kurdoherë në këtë segment. Këtë e mbështes në faktin se nga Drejtoria e Vakteve e Turqisë kemi pranuar pesë mijë pako me artikuj të domosdoshëm ushqimorë dhe sanitarë, të cilët Shoqata ‘Bereqeti’ i ka shpërndarë deri në zonat më të thella të Kosovës”, ka thënë Rexhepi për Epokën e re.

Rexhepi ka treguar edhe për përgatitjet që janë duke u bërë për ndërtimin e xhamisë së madhe në Prishtinë. Në këtë kontekst, ai ka thënë se shumë shpejt do të finalizohet projekti për ndërtimin e kësaj xhamie.

Ndërsa duke folur për pjesëmarrjen e disa të rinjve nga Kosova në luftërat e ISIS-it, sekretari i përgjithshëm i BIK-ut ka thënë se ata i kanë dhënë goditje të rëndë atdheut tonë.

“Në aspektin e imazhit na kanë dobësuar. Pjesëmarrja e tyre në ISIS ka qenë një grusht shumë i madh për Kosovën dhe atdheun tonë. Ata nuk kanë mundur t’i japin grusht më ta madh Kosovës sesa të shkojnë në ISIS”, ka thënë Rexhepi.