Ramë Dardania pjesë e ekspozitës ndërkombëtare në Carrousel du Louvre, Paris 2026

Krijimtaria e Ramë Dardanisë prezantohet në Carrousel du Louvre 2026

Artisti vizual Ramë Dardania do të përfaqësojë krijimtarinë e tij artistike në një nga ngjarjet më prestigjioze të artit bashkëkohor në Evropë, Carrousel du Louvre – Paris 2026. Pjesëmarrja e tij realizohet nën kurimin e Artistike – Swiss Art Association, një organizatë ndërkombëtare që promovon artin si gjuhë shpirtërore dhe universale, shkruan albinfo.ch.

Ekspozita do të mbahet në Paris nga 10 deri më 12 prill 2026, duke mbledhur artistë nga vende të ndryshme të botës, të cilët sjellin perspektiva, stile dhe emocione të ndryshme përmes artit vizual. Në këtë kontekst, prania e Ramë Dardanisë shënon një hap të rëndësishëm në rrugëtimin e tij artistik ndërkombëtar.

I njohur për përdorimin e fuqishëm të ngjyrës dhe figurave ekspresive, Dardania sjell një art që komunikon drejtpërdrejt me shikuesin, duke reflektuar emocione njerëzore, identitet dhe liri krijuese. Veprat e tij dallohen për energjinë vizuale dhe sinqeritetin artistik, duke e vendosur atë në dialog me artin bashkëkohor evropian.

Pjesëmarrja në Carrousel du Louvre, një hapësirë e njohur për ekspozitat elitare dhe bashkëkohore, konfirmon vlerësimin ndërkombëtar për punën e tij dhe e pozicionon Ramë Dardaninë si një zë gjithnjë e më të pranishëm në skenën artistike evropiane./Albinfo.ch

---