Rasti i ish-kryetarit të Lipjanit kthehet në rigjykim

Në gjykim kryesor do të shkojë rasti ndaj ish-kryetarit të Lipjanit dhe të tjerëve. Gjykata e Apelit ka refuzuar ankesat e mbrojtësve, duke vërtetuar aktakuzën e Prokurorisë.

Shukri Buja dhe shtatë persona të tjerë akuzohen për keqpërdorim të detyrës zyrtare, marrje ryshfeti dhe punime ndërtimore të paligjshme.

Rasti ka të bëjë me një memorandum mirëkuptimi, të nënshkruar nga Komuna e Lipjanit me kompaninë “NEW Co Feronikel Complex LL. C.”.

Komuna e Lipjanit, në kohën kur drejtohej nga Shukri Buja më 21 mars 2008, kishte nënshkruar memorandum me “NEW Co Feronikel Complex LL. C.”, për dhënien me qira kësaj kompanie një ndërtesë të laboratorit në Lipjan, përcjell albinfo.ch.
Sipas aktakuzës, në memorandum ishte përcaktuar që “NEW Co Feronikel Complex LL. C.” të paguajë nga një euro në muaj qira për objektin e laboratorit, ndërsa kompanisë ky laborator i ishte dhënë për 10 vjet. Me këtë, Prokuroria pretendon se i është shkaktuar dëm Komunës së Lipjanit.