Reagimet pas vrasjes së 35 vjeçarit nga RENEA

Ministria e Greqisë ishte e para e cila reagoi në lidhje me vrasjen e  35 vjeçarit pas ngjarjes në Bularat, ku ky i fundit qëlloi me armë zjarri ndaj forcave të policisë dhe pas disa orësh u vra nga shkëmbimi i zjarrit me RENEA-n.

“U informuam për vrasjen e të riut. Me autoritetet shqiptare po ndjekim zhvillimet. Ngushëllime për vdekjen e homogjenit grek. E papranueshme humbja e jetës së një personi në çdo rrethanë. Shprehim keqardhjen tonë për vdekjen e shtetasit grek”, thuhet në reagimin grek.

Ministria për Evropën dhe Punët e Jashtme e Republikës së Shqipërisë, ka reaguar pas ngjarjes së ndodhur sot në Bularat, Gjirokastër, ku humbi jetën shtetasi Konstandinos Kacifa.

Gjithashtu ministria ka shprehur keqardhje edhe për politizimin e ngjarjes në shtetin grek.

“Rrethanat në të cilat humbi jetën shtetasi Kacifa janë bërë të ditura zyrtarisht nga autoritetet kompetente shqiptare. Policia e Shtetit ka sqaruar me detaje se kjo është një ngjarje totalisht e izoluar nga aktivitetet e sotme ne zonë dhe nje rast flagrant agresioni ekstremist ndaj Policisë së Shtetit Shqiptar. Ministria për Evropën dhe Punët e Jashtme shpreh zhgënjim për reagimin e Ministrisë së Punëve të Jashtme të Greqisë, e cila jo vetëm nuk dënon sulmin me armë ndaj forcave tona të rendit, po flet për “humbje jete të papranueshme”, thuhet në reagimin e ministrisë.

Edhe kryeministri i Shqipërisë, Edi Rama me anë të një postimi në rrjetin social “Twitter” ka shkruar në lidhje me ngjarjen e cila bëri bujë në media.

“Fqinj të dashur! Në vend ta quani të papranueshme humbjen e jetës së një të fandaksuri që qëlloi me plumba luftarakë mbi policinë tonë, e cila bëri vetëm detyrën e saj, bashkohuni me ne në falenderimin e Zotit që asnjë jetë e pafajshme nuk humbi sot nga marrëzia ekstremiste”, shkruajti Rama.