Referendum për një sigurim shëndetësor të njësuar

Në anketën e fundit SRG, 54 për qind e të anketuarve kundërshtuan iniciativën në fjalë. 38 për qind votuan në favor, ndërsa 8 për qind kanë abstenuar

Për herë të dytë do të votohet të dielën për ndryshimin e sigurimit shëndetësor në një sigurim të njësuar në Zvicër. Është fjala për iniciativën “Për një sigurim publik shëndetësor”.
Deri sot të siguruarit kanë mundur të zgjedhin në mesin e 61 sigurimeve shëndetësore një sigurim bazë. Nën mbikëqyrjen e Zyrës Federale të Shëndetit Publik (BAG), të gjitha këto sigurime shëndetësore ofrojnë të njëjtin produkt, pra sigurimin shëndetësor të detyrueshëm.

Iniciatorët konsiderojnë se sigurimet shëndetësore janë të shtrenjta. Për reklamat dhe ndërrim të sigurimeve për çdo vit shpenzohen rreth 325 milionë franga zvicerane.
PS, Të Gjelbrit, sindikatat, pacientët dhe organizatat e konsumatorit si dhe shumë nga shoqatat profesionale e mbështesin iniciativën, ndërsa sigurimet shëndetësore dhe organizatat ekonomike janë kundër iniciativës në fjalë.

Gjithashtu, Këshilli Federal refuzon ndryshimin e sistemit. Ministri i Shëndetësisë, Alain Berset, thotë se ndryshimi në një sigurim shëndetësor publik megjithatë do të sjellë pasiguri dhe janë të vështira për t’u llogaritur shpenzimet.

Nisma vështirë se mund të marrë shumicën e votave në referendumin e së dielës. Në anketën e fundit SRG, 54 për qind e të anketuarve kundërshtuan iniciativën në fjalë. 38 për qind votuan në favor, ndërsa 8 për qind kanë abstenuar.

Megjithatë, fjalën e fundit e kanë qytetarët në referendumin e së dielës.