Refugjatët në Gjermani, më të shëndetshëm se gjermanët

«Ata nuk bartin me vete asnjë sëmundje ngjitëse dhe nuk vijnë as njerëz me sëmundje kronike», ka thënë kryetari i mjekëve gjermanë

Refugjatët që vijnë në Gjermani, janë në gjendje «mbinormale të mirë» shëndetësore. Këtë e thotë kryetari i Federatës së Mjekëve të Gjermanisë,  Frank-Ulrich Montgomery për gazetën gjermane «Welt».

«Ata nuk bartin me vete asnjë sëmundje ngjitëse dhe nuk vijnë as njerëz me sëmundje kronike», ka thënë kryetari i mjekëve.

Kjo gjendje shpjegohet me faktin se sipas rregullit, këtu vijnë me shumicë «meshkuj, të rinj dhe dinamikë». Për këtë arsye ai thotë se është e pabazuar frika se me ardhjen e refugjatëve në Gjermani po mbingarkohet sistemi i atjeshëm shëndetësor.

Këtë ai e dëshmon me koston shëndetësore që shkaktojnë refugjatët, e që është më e ulët se ajo e shkaktuar nga gjermanët. Konkretisht, trajtimi mjekësor mesatar i një azilkërkuesi sipas kryetarit të mjekëve kushton 2300 euro ndërkohë që për trajtimin e një gjermani nevojiten 600 euro më shumë.

Kyetari i mjekëve ka folur në superlativ edhe për shkallën e lartë të gatishmërisë së refugjatëve për të pranuar vaksinimin që u ofrohet me të ardhur në Gjermani.