Refugjatët nga Ukraina mund të udhëtojnë falas me trenat e SBB-së

“Për momentin, SBB u mundëson të ikurve nga Ukraina të udhëtojnë drejt destinacionit të tyre në Zvicër ose të kalojnë tranzit me tren lehtësisht dhe pa pagesë"

Ndërmarrja Federale e Hekurudhave të Zvicrës, SBB lejon refugjatët ukrainas të udhëtojnë në trenat e saj pa pagesë. Kjo u bë e ditur nga Bundesbahn të hënën.

Siç është njoftuar, gjysmë milion njerëz nga zona e luftës janë tashmë në arrati, transmeton albinfo.ch. Radhë të gjata makinash dhe autobusësh janë krijuar në pikat e kontrollit në kufijtë me Poloninë, Hungarinë, Sllovakinë dhe Moldavinë. Kjo e fundit,  jo-anëtare e BE-së.

Të tjerë kanë kaluar kufijtë në këmbë, duke marrë me vete gjësednet më të domosdoshme, për t`i ikur luftës gjegjësisht për të gjetur sigurinë e tyre, në vendet e BE-së.

Shumë prej tyre, supozohet se mund të vijnë edhe në Zvicër.

Siç raportohet nga SBB, refugjatët nga Ukraina mund të udhëtojnë falas në trenat e saj, shkruan 20minuten.ch.

“Për momentin, SBB u mundëson njerëzve që kanë ikur nga Ukraina të udhëtojnë drejt destinacionit të tyre në Zvicër ose të kalojnë tranzit me tren lehtësisht dhe pa pagesë. Kjo është në përputhje me vendimin e Këshillit Federal të sotëm, 28 shkurt 2022, dhe në konsultim me Sekretariatin Shtetëror për Migracionin (SEM)”, njofton SBB.

Kjo konfirmohet edhe nga Alliance SwissPass. Vendimi u mor në konsultim me Deutsche Bahn të Gjermanisë dhe Hekurudhat Federale Austriake.

---