Regjistrimi i popullsisë në Shqipëri, ministri Mazniku: Ka pyetje për emigrantët, etninë dhe fenë

@albinfo.ch

Në Shqipëri po vazhdon procesi i regjistrimit të popullsisë dhe në lidhje me këtë, ministri Arbër Mazniku në një intervistë për TCH ka njoftuar se në pyetësor, përveç të dhënave që tashmë dihen, po mblidhen të dhëna edhe për numrin e emigrantëve dhe vendet ku ata jetojnë, por ka pyetje edhe për deklarimin e fesë dhe etnisë.

“Nga informacionet që kemi nga terreni, procesi po ecën shumë mirë. Nuk kemi pasur asnjë problem thelbësor me procesin. Në terren sot që flasim janë më shumë se 5200 intervistues në gjithë Shqipërinë, të cilët që nga momenti që ka filluar procesi kanë bërë në ditë 5-6 intervista, siç është normativa e intervistave ditore mesatarisht”, ka thënë ai.

Sa i përket numërimit të emigrantëve që janë jashtë territorit shqiptar, ai ka thënë se pavarësisht se nuk është objektiv i këtij censi, personi që pyetet qoftë ai kryefamiljari apo personi përgjegjës për t’u përgjigjur për familjen, gjithashtu përgjigjet për numrin e anëtarëve të familjes që janë në emigracion, vendin ku ata janë, arsyen pse kanë emigruar, përgjigje këto të cilat do të japin një imazh edhe më të qartë për numrin e shqiptarëve në emigracion dhe vendndodhjen e tyre.