Remitencat e diasporës të orientohen në zhvillim ekonomik

Eksperti i ekonomisë, Naim Gashi thotë se remitencat duhet të orientohen në investime në ndërmarrje të vogla, ferma, dyqane zejtare, me qëllim që të zhvillohet vendi

Diaspora kosovare vazhdon të mbetet shtylla kryesore e stabilitetit social, të hyrat e të cilëve shkojnë kryesisht për konsum të brendshëm. Sipas statistikave bankare, remitencat nga mërgimtarët arrijnë në 650 milionë euro, ose janë 18 përqindëshi i bruto produktit të brendshëm.   

Ekspertët e çështjeve ekonomike, derisa e konsiderojnë diasporën si shtyllë të Kosovës, ata kërkojnë që të hyrat e tyre të ndërrojnë destinacionin. Në vend se të shkojnë për produkte ushqimore dhe shëndetësi, sipas tyre, remitencat të orientohen në zhvillim ekonomik. 

Naim Gashi ënjtë eksperti i ekonomisë. Ai thotë për REL se dërgesat emigrantëve janë investime jo vetëm në familjet e tyre, por në gjithë Kosovën.

“Unë sugjeroj që ata të fillojnë të investojnë në ndërmarrje të vogla, në ferma prodhuese kooperativa bujqësore, iniciativa të vogla, dyqane zejtare të ndryshme dhe të fillojnë dalëngadalë që dërgesat për konsum që i kanë dërguar nëpër familjet e tyre, t’i orientojnë në investime”, konsideron Gashi. 

Diaspora kosovare së fundi ka shprehur interesim për të krijuar fonde të veçanta zhvillimore, por deri më tani nuk ka pasur asgjë konkrete.  

Sidoqoftë Naim Gashi, thekson se investimi i diasporës në ndonjë ndërmarrje të vogël apo të mesme, do të ndikonte në zhvillim më të hovshëm ekonomik. 

“Përmes kësaj do të gjenerojmë vende pune për familjarët e tyre, do të përmirësonim  bilancin tregtar të pagesës me vendet e jashtme, do të forconim kapacitetet e prodhimit vendor dhe njëkohësisht do të gjeneronin një fitim simbolik për ata që investojnë në Kosovë”, thekson Gashi.

Thuhet se afër 25 për qind e popullatës, ose mbi 500 mijë emigrantë kosovarë jetojnë në vende të ndryshme të Evropës.  

Sipas një sondazhi të Institutit të Hulumtimeve Gallup, të bërë kohë më parë, pas anketimeve të zhvilluara në 135 vende të botës, del se Kosova radhitet lart në listën e vendeve që marrin remitenca, me 23 për qind apo me më së shumti në rajon. 

Ministri i Diasporës, Ibrahim Makolli, konsideron se faktor kyç në zhvillimin ekonomik të vendit janë mjetet që dërgohen nga diaspora kosovare. Zhvillimi ekonomik i deritashëm i Kosovës, sipas tij, është si rezultat i remitencave që ata i kanë dërguar në Kosovë.

“Ka një interesim më të madh në fusha të ndryshme, ne po përpiqmi t’i përkrahim. Në kuadër të kësaj, ne po veprojmë edhe me institucionet tjera, të cilat janë të thirrura për hartimin e politikave të investimeve dhe në këtë kuadër tashmë në Kosovë do të ketë një pako ligjore që do të parashohë lehtësime për investime nga ana e mërgatës sonë”, thotë Makolli.

Këtë interesim të mërgatës, thekson Makolli, ka përpjekje për ta konkretizuar në veprim. Ai tregon se për investimet që mund t’i bëjë mërgata, janë bërë lehtësira gati në të gjitha komunat e Kosovës.