Revista e manifestimit “Kurora e Lirisë”, një publikim që sjell standard të ri

Kjo revistë përfaqëson një ndër botimet e para të këtij niveli, e cila sjell një format tërësisht të strukturuar, të kuruar estetikisht dhe profesionalisht

Në kuadër të manifestimit përkujtimor dhe kulturor “Kurora e Lirisë”, i mbajtur më 14 mars në Bernë, u prezantua dhe u shpërnda revista zyrtare e këtij projekti,  një botim i veçantë që vendos një standard të ri në dokumentimin e aktiviteteve të diasporës shqiptare në Zvicër.

Kjo revistë përfaqëson një ndër botimet e para të këtij niveli, e cila sjell një format tërësisht të strukturuar, estetikisht të kuruar dhe profesionalisht të realizuar.

Ajo ndërthur në mënyrë harmonike kujtesën historike, dimensionin artistik dhe dokumentimin institucional, duke krijuar një vepër të plotë dhe të qëndrueshme në kohë.

E konceptuar si një dokument i rëndësishëm i kujtesës kolektive, revista ofron një pasqyrë të detajuar të manifestimit, duke përfshirë konceptin, programin artistik, pjesëmarrjen e shoqatave kulturore, si dhe rolin e brezave të rinj në ruajtjen dhe transmetimin e vlerave kombëtare.

Në thelb të saj qëndron kujtesa e Prekazit dhe sakrifica e Familjes Jashari, e trajtuar jo vetëm si një moment historik, por si një themel i identitetit tonë kombëtar dhe një amanet që vazhdon të jetojë në ndërgjegjen kolektive të shqiptarëve kudo që ndodhen.

Një dimension i veçantë i këtij botimi është përfshirja e ekspozitës fotografike “Prekazi dashuri, dhimbje dhe krenari kombëtare” të fotografit Sefer Aliçkaj, e cila përmes imazhit sjell një rrëfim të fuqishëm emocional dhe historik.

Po ashtu, një vend i rëndësishëm i kushtohet edhe angazhimit të shoqatave studentore shqiptare, të cilat përfaqësojnë energjinë, vizionin dhe të ardhmen e popullit tonë.

Ato mbartin shpresën dhe besimin e mërgatës shqiptare për vazhdimësinë e sukseseve, duke dëshmuar se identiteti, kultura dhe angazhimi kombëtar jetojnë dhe forcohen përmes brezave të rinj.

 

 

Revista pasqyron gjithashtu angazhimin e gjerë të shoqatave dhe organizatave shqiptare në Zvicër, duke dëshmuar fuqinë e bashkëpunimit, unitetin dhe përkushtimin e mërgatës shqiptare ndaj ruajtjes së identitetit dhe kulturës kombëtare.

 

Programi artistik i reflektuar në këtë botim shpalos gjallërinë e kulturës shqiptare në diasporë, ku kënga, vallja dhe muzika shndërrohen në forma të gjalla të kujtesës dhe identitetit.

E shpërndarë falas për të gjithë mysafirët gjatë manifestimit, kjo revistë tashmë mbetet një kujtim i çmuar, i cili rikthen emocionet dhe përjetimin e një prej ngjarjeve më domethënëse të popullit shqiptar në Zvicër.

Për nga përmbajtja, cilësia dhe qasja profesionale, revista është e destinuar të shërbejë si material referues për ambasadat shqiptare, bibliotekat, institucionet kulturore dhe shoqatat shqiptare, duke e tejkaluar dimensionin e një publikimi të zakonshëm dhe duke u shndërruar në një dokument të rëndësishëm arkivor.

Kjo revistë shërben si kujtesë, përbën identitet dhe vazhdimësi. Dhe mbi të gjitha, ajo është dëshmi e një pune me përkushtim profesional dhe me një vizion që lë gjurmë të qëndrueshme në ndërgjegjen kolektive, një vepër që mban vulën krijuese dhe përkushtimin e autores Mirishahe Limani Hiler.

---