Rexha impresionohet nga publiku shqiptar

“Mirëmbra shqipe, jam në shtëpi. Ju dua shumë, faleminderit shumë. Unë jam shqiptare se unë jam dibrane dhe s’e di si i thoni në gjuhën letrare”, tha ajo para fansave

Këngëtarja shqiptare me famë botërore, Bebe Rexha ka impresionuar në koncertin e saj në Tiranë, me ç’rast janë mbledhur mijëra fansa të saj. Ajo është emocionuar shumë nga përkrahja që ka marr në karrierë nga fansat shqiptarë, përderisa e përlotur ka falënderuar ata për përkrahjen.

Ajo iu drejtua fansave në gjuhën shqipe. “Mirëmbra shqipe, jam në shtëpi. Ju dua shumë, faleminderit shumë. Unë jam shqiptare se unë jam dibrane dhe s’e di si i thoni në gjuhën letrare”, tha ajo.

Ajo më pas ka interpretuar një nga hitet e saj më të mëdhenj “Me, Myself & I”, për të cilën tregon në gjuhën shqipe se e ka shkruar me kitarë.

Bebe Rexha performoi “Take me home” e veshur me ngjyrat e flamurit kombëtar kuq e zi, ndërsa nuk harroi të përshëndeste fansat në gjuhën shqipe.

Këngëtarja 26-vjeçare me origjinë shqiptare është pritur nga qindra fansa, të cilët kënduan bashkë me të hitet e saj më të njohura.

“Fansat e mi më të mëdhenj në Facebook, Instagram, Snapchat, gjithkund janë gjithmonë shqiptarët, prandaj dua t’iu them faleminderit”, ka thënë ajo para publikut në Tiranë, të cilët kanë brohoritur pas këtyre fjalëve të saj.