Rohde do të hapë Forumin e Dytë Ekonomik Gjermano-Kosovar në Prishtinë

Ambasadori Gjerman do të hapë Forumin e Dytë Ekonomik Gjermano-Kosovar në Prishtinë, duke forcuar marrëdhëniet ekonomike mes dy vendeve

Drejtoresha Ekzekutive e Odës Ekonomike Gjermano-Kosovare, Nora Hasani, u takua me Ambasadorin gjerman, Jörn Rohde, dhe zëvendës ambasadorin Matthias Conrad, për të diskutuar Forumin e Dytë Ekonomik Gjermano-Kosovar, njoftojnë nga OEGJK.

Bëhet e ditur se Rohde do ta hapë zyrtarisht këtë forum, i cili do të mbledhë në Prishtinë liderë të biznesit dhe politikanë nga Gjermania dhe Kosova për të diskutuar të ardhmen e marrëdhënieve ekonomike midis dy vendeve.

Forumi, i organizuar nga Oda Ekonomike Gjermano-Kosovare dhe Komiteti Lindor i Ekonomisë Gjermane, do të mbahet më 2 dhe 3 tetor në Prishtinë.

“Në fillim të tetorit Prishtina pritet të bëhet qendra e bashkëpunimit gjermano-kosovar, pasi ky forum do të zhvillohet menjëherë pas ngjarjes rajonale SUBEX – Supplier Expo, që mbahet më 1 tetor në Prishtinë dhe bashkorganizohet nga tri oda gjermane: Oda Ekonomike Gjermano-Kosovare, Oda Ekonomike Gjermane e Maqedonisë së Veriut dhe Shoqata Gjermane e Industrisë dhe Tregtisë në Shqipëri”.

“Forumi Ekonomik Gjermano-Kosovar do të mirëpresë mbi 300 pjesëmarrës dhe ekspertë të industrisë nga Gjermania dhe Kosova. Ngjarja do të ofrojë një program tërheqës me diskutime në panele, intervista me ekspertë, podcast-e, masterclass-e, vizita në kompani dhe shumë më tepër”, thuhet në njoftim.

Më tej potencohet se Gjermania mbetet investitori më i madh i huaj në Kosovë (me 190 milionë euro investime të huaja direkte më 2023), donatori më i madh bilateral që nga paslufta, partneri kyç tregtar dhe shteti me diasporën më të madhe kosovare.

Forumi i parë Ekonomik Gjermano-Kosovar, i cili u mbajt në vitin 2022 rezultoi me investimin 20 milionë eurove në sektorin e automotivës, thuhet tutje në njoftim të Odës Ekonomike Gjermano-Kosovare.