Rrahen dhe fyhen futbollistët anglezë në Serbi

Futbollistët anglezë nën moshën 21-vjeçare në Serbi ishin viktima të sulmeve dhe fyerjeve raciste

“Kishte fyerje raciste të spektatorëve dhe ka pasur shumë ndodhi pas ndeshjes”, raportoi kapiteni Jordan Henderson. “Gjithashtu u hodhën gurë dhe karrige në ne”, tha kapiteni i ekipit anglez U21.

Tifozët serbë kanë imituar majmunët në stadium, fyrje drejtuar lojtarëve anglezë me ngjyrë në ndeshjen mes ekipeve serbe dhe angleze nën moshën 21 vjeçe, e cila u zhvillua në Krushevc të Serbisë.

Po ashtu disa nga futbollistët anglezë janë sulmuar nga lojtarët serbë. Rrugës për kabinë ka pasur përleshje mes zyrtarëve të të dyja ekipeve.

Qeveria britanike i ka shkruar presidentit të UEFA-s, Michel Platini, nga i cili ka kërkuar “sanksione të ashpra” kundër Serbisë pas fyerjeve raciste ndaj lojtarëve anglezë, të bëra nga tifozët serbë.

Serbia është paralajmëruar nga Platini se tifozët problematikë rrezikojnë ekipet e Serbisë nga ndalimi në garat evropiane.

Downing Street tha se kryeministri britanik David Cameron është “tmerruar nga skenat” dhe dëshiron që UEFA të vendosë “sanksione të ashpra” kundër Federatës serbe të futbollit.

“Ne jemi të vendosur që ta shtypim racizmin brenda dhe jashtë vendit dhe i japim mbështetje të plotë ankesës së Federatës angleze”, citon AP zëdhënësin e Cameron-it, Steve Field.