Rreth 2850 turistë e vizituan Sarandën këtë javë

Foto: bluewin.ch

Saranda, e ndodhur në gjirin e detit Jon dhe e konsideruar si një nga vendet më të bukura të rivierës shqiptare, u vizitua këtë fundjavë nga rreth 2850 turistë të huaj.

Porti i Sarandës bën të ditur për ATSH-në se “në bordin e kroçerës “MSC Musica” kishte turistë nga Austria, Belgjika, Brazili, Bullgaria, Danimarka, Gjermania, Hungaria, Irani, Italia, Spanja, Zvicra, Ekuadori, Polonia, Rusia, Uruguaji, Zelanda e Re etj.

Turistët e huaj vizituan pikat turistike të Sarandës, si Butrintin, Ksamilin, Syrin e kaltër, kalanë e Lëkurësit, Mesopotaminë etj.

Saranda po tërheq gjithnjë e më shumë turistët e huaj, ku vetëm për këtë vit në portin e qytetit bregdetar kanë rezervuar 42 kroçera.

Kapiteneria e portit dhe autoritetet e tjera që operojnë në të ofrojnë mbështetje maksimale për turistët.

Vetëm në javën e parë të qershorit qyteti i Sarandës u vizitua nga rreth 6 mijë turistë, shkruan ATSH.

Qyteti i Sarandës njihet për plazhet mahnitëse dhe ujin si kristal. Përveç diellit e plazhit, Saranda veçohet dhe për historinë dhe kulturën e saj: e magjishme është kalaja e Lëkurësit, ndërsa Parku Arkeologjik i Butrintit nxit kureshtjen e turistëve të shumtë me historinë e tij mijëravjeçare./k.s/ /a.g/