Rreth 7 mijë persona të punësuar në Kosovë

Zëvendësministrja e Punës dhe Mirëqenies Sociale, Rita Hajzeraj, ka treguar se gjatë këtij viti janë realizuar një numër i madh i projekteve që kanë të bëjnë për aftësim profesional dhe punësim.

„Sipas të dhënave tona të Ministrisë së Punës dhe Mirëqenies Sociale totali i të punësuarve është 6,556 persona, prej tyre 1,921 janë femra, të tjerët janë meshkuj të të gjitha nacionaliteteve, por shumica prej tyre janë të rinj që i përkasin nacionalitetit shqiptarë”,ka thënë Hajzeraj, për Radio Evropa e Lirë, pëcjell albinfo.ch.

Hajzeraj ka bërë të ditur se një grup i infermierëve gjatë këtij viti kanë shkuar të aftësohen dhe të punojnë në Zvicër.

Derisa një grup tjetër, ka shtuar Hajzeraj, kanë shkuar në Gjermani ku janë punësuar në kompani të ndryshme, që kanë të bëjnë me aftësim dhe punësim në profesionet e inxhinierisë.

Punësime tjera, sipas Hajzeraj, ka pasur përmes programeve të UNDP-së që është programi për vetpunësim ku kanë përfituar 40 biznese dhe vetëm në këtë vit, janë punësuar rreth 120 persona.

Papunësia është një nga problemet më të mëdha që ka përcjellë shoqërinë kosovare viteve të fundit.

Derisa, sipas të dhënave të kësaj agjencie shkalla e papunësisë në Kosovë, ka shënuar rritje në vitin 2014, nga 30.0 për qind sa ka qenë në vitin 2013 në 35.3 për qind në vitin 2014.