“Rreziku më i madh për Zvicrën, pranimi i Kosovës në FIFA”

"Rreziku është që në një të ardhme të parashikueshme Kosova të fitojë të drejtën për të marrë pjesë në kualifikimet për kampionatet evropiane e botërore"

Në një intervistë që trajneri i përfaqësueses zvicerane të futbollit, Otmar Hitzfeld i ka dhënë sajtit bilanz.ch është shprehur i brengosur për të ardhmen e kombëtares që e drejton deri në korrik të këtij viti.

Pyetjes nëse me votimin e Iniciativës kundër migracionit masiv (më 9 shkurt) janë ulur shanset që Zvicra të rekrutojë lojtarë me prejardhje të huaj ai i është përgjigjur “rrezik më i madh se ky (për kombëtaren e Zvicrës) është që në një të ardhme të parashikueshme Kosova si shtet të fitojë të drejtën për të marrë pjesë edhe në kualifikimet për kampionatet evropiane e botërore. Në një rast të tillë mund ta marr me mend se disa lojtarë do të mendohen për të kaluar në kombëtaren e Kosovës”.

I pyetur nëse kjo do të thotë që Zvicra ta humb Shaqirin, Hitzfeld ka thënë se “këtë nuk e di saktësisht pasi që ai ende nuk është shprehur në mënyrë të qartë rreth kësaj. Ai ka thënë se `kur kjo të ndodhë, unë do ta rishikoj edhe njëherë situatën`, përcjell trajneri i përfaqësueses zvicerane qëndrimin e Shaqirit.

Hitzfeld në intervistë ka folur edhe për synimet e skuadrës që udhëheq ai në Kampionatin Botëror në Brazil. “Duke u nisur nga ajo se ekipi im përbëhet kryesisht nga të rinjtë që në vitin 2009 si 17 vjeçarë patën fituar kampionatin botëror për juniorë, nuk është e tepërt të pritet nga ata që të ëndërrojnë titullin edhe kësaj here”, ka thënë Hitzfeld duke qeshur.