Rritet qiraja e banimit për studentët në Gjermani

Munihu është qyteti më i shtrenjtë për një banesë studentore. Çmimi është 665 euro në muaj, apo 18.4 për metër katror

Munihu

Kostoja e qirasë për studentët në Gjermani po bëhet gjithnjë e më e shtrenjtë. Sipas një studimi nga Instituti i Këlnit për Kërkime Ekonomike (IW), çmimet mesatare e qirave për studentët janë rritur ndjeshëm veçanërisht në qytetet e mëdha. Çmimet janë rritur që nga viti 2010, shkruan ‘thelocal.de’.

Rritja më e madhe në çmimet neto të qirasë që nga viti 2010 është regjistruar në Berlin, ku qiraja për studentët është rritur në 70.2 %, përcjell albinfo.ch.

Studentët në Berlin paguajnë një qira mesatare prej 430 euro ose rreth 11 euro për metër katror të hapësirës së banimit, që dallon shumë nga qytetet tjera.

Berlini mund të ketë rritjen më të madhe në çmimet neto të qirasë, por Munihu është qyteti më i shtrenjtë për një banesë studentore. Çmimi është 665 euro në muaj, apo 18.4 për metër katror. Nëse vazhdon me këtë ritëm, atëherë, çmimet do të vazhdojnë të rriten dhe mund të arrijnë shifrën e 20 eurove për metër katror.

Qyteti i dytë më i shtrenjtë sipas studimit është Shtutgarti me 14.9 euro për metër katror, dhe rritja e çmimit ka shkuar deri në 62.2 përqind.

Ndërkohë, në vendin e tretë është Frankfurti me 14 euro për metër katror, duke vazhduar më pas me Hamburgun dhe Heidelberg me 12 euro për metër katror.

Shpenzimet e qirasë janë rritur gjithashtu në Këln (22.3 përqind), Bonn (24.9 përqind), Kiel (35.3 përqind) dhe Leipzig (23.6 përqind).