Rritje dyshifrore e investimeve dhe remitencave

Investimet e huaja direkte u rritën me 36 për qind në tremujorin e dytë të këtij vitit, ndërsa remitencat për 17.6 për qind. Ky është gjysmëvjetori më i frytshëm në Shqipëri

Foto Ilustrim

Tremujori i dytë ka qenë më i frytshmi për Shqipërinë, e cila ka shënuar rritje dyshifrore  edhe në investimet e kompanive të huaja në ekonominë shqiptare si dhe në dërgesat e bashkatdhetarëve. Kështu ka raportuar Banka e Shqipërisë, në raportin e fundit bazuar në investime dhe remitenca.

Investimet e huaja direkte u rritën me 36 për qind në tremujorin e dytë të vitit, duke arritur në 198 milionë euro nga 145 milionë që ishin në të njëjtën periudhë të vitit 2014.

Sipas shifrave, investimet e huaja këtë gjysmë-vit janë 31.5 për qind më të larta se gjysma e parë e vitit të kaluar. E shprehur në vlerë monetare rritja është 115 milionë euro.

“Në raportin analitik të bilancit të pagesave, Banka e Shqipërisë thotë se prurjet më të mëdha në formën e investimeve direkte vijnë nga sektori i hidrokarbureve në vlerë 226 milionë euro ose sa 47 për qind e totalit. Në vend të dytë vjen sektori bankar dhe ai i telekomunikacionit, që përfaqësojnë përkatësisht 10 dhe 3 për qind të flukseve hyrëse të investimeve që vijnë nga jashtë”, thuhet në raportin të cilin e citon TCH.

Sipas Bankës edhe dërgesat e emigrantëve shënuan rritje dyshifrore me 17.6 për qind krahasuar me të njëjtën periudhë të vitit të kaluar. Më konkretisht, për periudhën prill-qershor dërgesat e emigrantëve ishin 162.5 milionë euro nga 138.1 milionë që ishin një vit më parë.

Të dhënat tregojnë se, të paktën për gjashtë muajt e parë të vitit dërgesat nuk janë goditur nga përshkallëzimi i krizës greke, edhe pse ajo e shënoi kulmin pas fundit të qershorit, kur Greqia mbylli bankat. Në total si gjashtëmujor, remitencat ishin 305 milionë euro, ose rreth 48.5 milionë euro më shumë se gjysma e parë e vitit të kaluar.

Pas disa vitesh rënie, trendi i dërgesave të emigrantëve u rikthye në territor pozitiv gjysmën e dytë të vitit të kaluar, i ndikuar ndoshta edhe nga përmirësimi i situatës ekonomikë në Eurozonë. Ndryshe edhe në Shqipëri, si vendet e rajonit, remitencat janë një amortizator i gjendjes sociale.