Rritje e të lënduarve rëndë në aksidentet me tramvaje dhe autobusë në Zvicër

keystone (AP Photo/Vaggelis Kousioras)

Sipas të dhënave të Zyrës Federale të Transportit (ZFT), në vitin 2024 në Zvicër janë regjistruar 105 pasagjerë të lënduar rëndë në aksidente me tramvaje dhe autobusë, numri më i lartë në pesë vitet e fundit. Gjithashtu, 39 persona kanë humbur jetën në aksidente që përfshijnë transportin publik.

Shumica e aksidenteve ndodhin për shkak të gabimeve të përdoruesve të tjerë të rrugës, si këmbësorë, çiklistë dhe shoferë, të cilët shpesh shkelin rregullat e qarkullimit. Nga 39 viktimat, 34 ishin persona të tretë, jo pasagjerë apo punonjës të transportit, transmeton albinfo.ch.

Zyra Federale e Transportit po analizon shkaqet dhe po mbështet fushata për rritjen e sigurisë në transportin publik, me fokus në ndërgjegjësimin e përdoruesve të rrugës dhe përmirësimin e masave parandaluese.

Në krahasim ndërkombëtar, Zvicra renditet ndër vendet më të sigurta në hekurudha, por ka ende sfida në sigurinë në kantieret e punës së transportit hekurudhor.