Rrjeti i Bizneseve Shqiptare në Austri: Jemi të gatshëm të ndihmojmë familjet e viktimave

Pas tragjedisë së rëndë në Vjenë, ku humbën jetën tre shtetas nga Kosovë, komuniteti shqiptar në Austri shpreh solidaritet dhe gatishmëri për mbështetje

Rrjeti i Bizneseve Shqiptare në Austri ka reaguar pas ngjarjes tragjike në Vjenë, ku tre shtetas të Kosovës humbën jetën në vendin e tyre të punës, duke shprehur dhimbje të thellë dhe solidaritet me familjet e viktimave, shkruan albinfo.at.

Përmes një reagimi publik, përfaqësuesit e këtij rrjeti kanë theksuar se në këto momente të rënda qëndrojnë pranë familjarëve dhe gjithë komunitetit shqiptar, duke ndarë dhimbjen për humbjen e rëndë.

“Shprehim ngushëllimet më të sinqerta për familjet e viktimave, të afërmit dhe gjithë komunitetin shqiptar. Jemi pranë tyre në këtë periudhë të vështirë dhe të gatshëm të ofrojmë mbështetjen e nevojshme”, thuhet në reagim.

Më tej bëhet e ditur se Rrjeti i Bizneseve Shqiptare në Austri është në kontakt të vazhdueshëm me institucionet përkatëse, si dhe me Ambasadën e Republikës së Kosovës në Austri, për të ndjekur zhvillimet dhe për të koordinuar çdo formë ndihme për familjet e prekura.

Ngjarja ka tronditur komunitetin shqiptar në Austri dhe më gjerë, ndërsa autoritetet pritet të japin detaje të mëtejshme lidhur me rrethanat e kësaj tragjedie. /Albinfo.at

---