Rrjeti i OJQ-ve “Demokracia në Veprim” ende pa rezultate

Ismet Kryeziu: Votimet duhet të përsëriten në çdo vendvotim ku ka pasur parregullsi

Ismet Kryeziu nga rrjeti i OJQ-ve “Demokracia në Veprim”, ka thënë sot se një vendim i tillë për përsëritjen e votimeve me parregullsi do të mund të merret nga organet kompetente, që nënkupton vendimet e Panelit Zgjedhor për Ankesa dhe Parashtresa, e më pas edhe të KQZ-së.

Ai ka përmendur Skenderajt dhe Drenasin, komunat më të përfolura për manipulim të votës së qytetarëve.

Demokracia në Veprim as sot nuk ka publikuar rezultatet preliminare nga zgjedhjet e së dielës.

Sipas Kryeziut, publikimi i tërësishëm i rezultateve nuk është bërë për shkak të parregullsive në shumë vendvotime, sidomos në Skenderaj e Drenas.

Në mesin e parregullsive, të cilat Kryeziu ka thënë se i kanë deponuar në PZAP, zënë vend votimet e  shumëfishta, shpërputhja e fletëve të votimit me numrin e nënshkruesve, votimet dhe tentimet për të votuar më shumë se një herë, problemet e vazhdueshme me llamba dhe sprein, vonesa në dërgimin e materialit zgjedhor, kërcënimi i vëzhguesve si dhe dalja enorme në vendvotime e qytetarëve në Skenderaj e Drenas dhe komuna të tjera.