Sa para i mbetën Mark Zuckerbergut pas humbjeve miliardëshe?

EPA/KAY NIETFELD

Pasuria e Mark Zuckerberg, bashkëthemelues i Facebook, u tkurr me më shumë se 6 miliardë dollarë në pak orë, pas rënies së kompanisë në tregun e aksioneve dhe nga një megadefekt dje.

Rrjeti social po përballet me akuzat për “fitime në kurriz të sigurisë”.

Hulumtimet e brendshme për grupin kanë treguar se rrjeti i tij social, Instagram, ka efekte negative në moralin e vajzave adoleshente, raporton Afp, përcjell Albinfo.ch.

Këtyre akuzave iu shtua të hënën një megadefekt, që ndaloi hyrjen në katër rrjetet dhe shërbimet e mesazheve të grupit, Facebook, Instagram, Whatsapp dhe Messenger, që zakonisht vizitohen çdo muaj nga rreth 3,5 miliardë përdorues në të gjithë botën.

Për shkak të rënies së aksioneve të tij, kreu i grupit, Mark Zuckerberg, 37 vjeç, humbi më shumë se 6 miliardë dollarë brenda pak orësh, duke e ulur pasurinë e tij në 121,6 miliardë dollarë, sipas një raporti nga Bloomberg.

Humbjet e tij kanë arritur në 15 miliardë, që nga mesi i shtatorit.

Facebook është një nga kapitalizimet më të mëdha në Wall Street, duke u renditur përgjithësisht pas Apple, Microsoft, Google (Alphabet) dhe Amazon.