Sa për qind e mjekëve në Zvicër janë vaksinuar?

Zvicra është cilësuar si një nga shtetet me mjekët më skeptik për marrjen e vaksinës. Por a është e vertetë?

Shpeshherë Zvicra është cilësuar si një nga shtetet ku mjekët janë skeptikë për marrjen e vaksinës anti-Covid, transmeton albinfo.ch. Por, kjo duket se nuk është e vërtetë, pasi një studim i përgatitur nga Gfs Bern, i porositur nga Federata Zvicerane e Mjekëve (FMH), bën të mundur përgjigjen e një pyetjeje që ka mbetur e hapur për një kohë të gjatë, konkretisht sa mjekë kanë marrë vaksinat.

Theksohet se në bazë të sondazhit, i paraqitur nga NZZ am Sonntag, dalin në pah të dhëna konkrete, duke vënë në dukje se rreth 91% e mjekëve kanë marrë vaksinën kundër Covid-19.

Referuar përmbajtjes së studimit, rezulton se kjo përqindje është e destinuar të rritet me shpejtësi ,duke qenë se 4.2% e të intervistuarve kanë konfirmuar synimin e tyre për të vaksinuar deri në fund të vitit 2021 dhe duhet theksuar se numri i mjekëve tashmë të vaksinuar është i konsiderueshëm, veçanërisht atyre që punojnë në spitale.

Vlen të theksohet se i konsiderueshëm është edhe numri i mjekëve të prekur nga koronavirusi (15% krahasuar me mesataren 8% në pjesën tjetër të popullsisë), në lidhje me faktin se pa dyshim është një kategori profesionale më e ekspozuar ndaj rrezikut të infektimit. Një kategori që vuan gjithashtu efektet e stresit dhe ngarkesës së punës, edhe nëse për Gfs.Bern nuk është e mundur që të lidhen “direkt” këto të dhëna me pandeminë. Në fakt, mjekët duhet të përballojnë efektet e burokracisë, e cila është rritur nga 36 minuta në ditë në 2011 në mbi dy orë tani. rsi-eb.

---