Sa shpenzojnë shqiptarët jashtë vendit?

Shpenzimet kanë kërcyer në tremujorin e tretë të sezonit turistike, me 19.4%, duke arritur në 486 milionë euro

Kthimi i Shqipërisë në një destinacion të preferuar për turistët po sjell më shumë para në vend. Sipas statistikave të bilancit të pagesave të Bankës së Shqipërisë, në periudhën janar-shtator, të huajt kanë sjellë në vend 1.47 miliardë euro, niveli më i lartë rekord i regjistruar ndonjëherë.

Por, ndërsa të huajt po shpenzojnë më shumë në Shqipëri, edhe shqiptarët nuk kursehen aspak kur dalin jashtë vendit.

Po të njëjtat të dhëna të Bankës së Shqipërisë bëjnë të ditur se në udhëtimet e tyre, shqiptarët shpenzuan 1.1 miliardë euro, me një rritje prej 14% në raport me të njëjtën periudhë të një viti më parë, transmeton “Monitor”.

Shpenzimet kanë kërcyer në tremujorin e tretë të sezonit turistike, me 19.4%, duke arritur në 486 milionë euro, përcjell albinfo.ch

Turqia është një destinacion i preferuar në verë, me charter-at drejt Antalias që çdo vit shënojnë rritje dyshifrore, sipas të dhënave të raportuara nga Tirana International Airport.

Për 9-mujorin, bilanci i udhëtimeve ka qenë pozitiv për Shqipërinë, me të ardhurat neto që kanë mbetur në vend prej 359 milionë euro, me një rritje vjetore prej 6%.

Ky bilanc është rritur me shpejtësi, që nga 2013-a kur ai ishte negativ (d.m.th. shqiptarët shpenzonin më shumë jashtë sesa të huajt te ne), duke reflektuar rritjen e shpejtë të turistëve.

---