Scholz, drejt shteteve arabe në përpjekje për të siguruar gaz

Është e paqartë nëse gjatë vizitës do të arrihen marrëveshje për importin e gazit ose, në terma afatgjatë, të hidrogjenit nga rajoni në Gjermani.

Kancelari gjerman, Olaf Scholz, udhëtoi sot drejt Arabisë Saudite përpara se të vizitojë Emiratet e Bashkuara Arabe dhe Katarin, ku do të mbahet Kupa e Botës në fund të këtij viti.

Burime qeveritare theksuan për dpa se ndërsa turneu i parë i Scholz-it në gadishullin arabik do të fokusohet kryesisht në diskutimin se si të dilet nga kriza energjetike gjermane, ai do të trajtojë gjithashtu situatën e të drejtave të njeriut dhe çështjet e sigurisë.

Në metropolin saudit të Jeddah, kancelari do të takohet me princin e kurorës, Mohammed bin Salman, i akuzuar nga inteligjenca amerikane për vrasjen brutale të gazetarit Jamal Khashoggi katër vjet më parë, përcjell Albinfo.ch.

Princi i kurorës ka mohuar të ketë autorizuar krimin.

Vrasja çoi në një krizë të thellë diplomatike midis Gjermanisë dhe Arabisë Saudite. Zëdhënësi i qeverisë, Steffen Hebestreit, tha kur u njoftua udhëtimi se ”krimi me siguri do të luante një rol” në bisedimet e kancelarit.

Princi i kurorës fillimisht ishte kryesisht i izoluar ndërkombëtarisht pas vrasjes. Një takim me presidentin amerikan, Joe Biden, në Jeddah dhe një udhëtim në Bashkimin Evropian në korrik, gjatë të cilit ai u takua me presidentin francez, Emmanuel Macron, në Paris, nisi një normalizim të marrëdhënieve të tij me liderët perëndimorë.

 

---