Seferi tregon arsyet pse dorëzoi meçin

“Unë kam krenari, jam Sefer Seferi. Jam boksier i vërtetë. Jam burrë i ndershëm”, theksoi boksieri që jeton në Zvicër

Boksieri shqiptar, Sefer Seferi dorëzoi meçin pas raundit të katërt ndaj Tyson Fury, në meçin e zhvilluar në Mançester të shtunën.

Ai është shprehur se një goditje e Furyt me të djathtës ishte ‘fatale’ dhe nuk mundi të vazhdojë meçin, sepse e kishte të bllokuar krahun e djathtë.

“E kam nisur mirë. Ai ishte më i rëndë, por unë më i shpejt. Në raundin e katërt mora një goditje me të djathtën. Më pas më është bllokuar krahu dhe mora vendimin se nuk mund të vazhdoj më, diferenca ishte e madhe me Tyson Furyn”, është shprehur Seferi për ‘Blick’.

Ai shtoi se ka marrë vendimin e duhur, sepse nuk funksiononte asgjë, përcjell albinfo.ch.

Boksieri shqiptar shtoi se nuk është penduar aspak. “Unë kam krenari, jam Sefer Seferi. Jam boksier i vërtetë. Jam burrë i ndershëm”, theksoi boksieri që jeton në Zvicër.

Seferi në fund shtoi se boksieri britanik ishte dukshëm favorit, dhe një niveli tjetër, derisa dhimbjet kanë qenë aq të mëdha saqë dëshironte që meçi të përfundonte sa më shpejt.