Seferi tregon për gjestin e tij “Kumanova është Shqipëri”

“Megjithatë, ai është mendimi imi dhe i çdokujt që e ndien veten shqiptar. Nuk doja të provokoja maqedonasit, pasi kam luajtur aty, por dua të theksoj edhe njëherë se ky është mendimi i të gjithë shqiptarëve”, u shpreh Seferi

Futbollisti shqiptar, Taulant Seferi në një intervistë për “Lajmi TV” në Maqedoni, ka folur për shumë gjëra.

Lojtari i Shqipëria U-21 është pikë referuese në formacionin e Alban Bushit, ndërkohë që synimet e tij janë për fanellën e Kombëtares A, që drejtohet nga Christian Panucci, përcjell albinfo.ch.

Mediat maqedonase u tërbuan kur Seferi pozoi pas miqësores me Bjellorusinë me një bluzë të bardhë, sipër së cilës shkruhej “Kumanova është Shqipëri”.

“Kur e bëra foton me fanellën e Shqipërisë, duke thënë se “Kumanova është Shqipëri”, nuk e kisha qëllimin për të prekur maqedonasit. Megjithatë, ai është mendimi imi dhe i çdokujt që e ndien veten shqiptar. Nuk doja të provokoja maqedonasit, pasi kam luajtur aty, por dua të theksoj edhe njëherë se ky është mendimi i të gjithë shqiptarëve”, u shpreh Seferi, që luan në Zvicër.

Ai foli edhe për ndeshje miqësore ndaj Bjellorusisë. “Me Bjellorusinë kemi bërë dy ndeshje shumë të bukura dhe kjo gjeneratë e 1999 ka kualitete shumë të mira. Kemi merituar fitoren në të dyja takimet me Bjellorusinë, por e rëndësishme është që kemi dalë me fitore në një prej tyre. Kam ndier emocione të mëdha duke mbajtur shiritin e kapitenit të Shpresave. Për mua ishte një nder dhe krenari. Nuk e kisha pritur, u nisëm prej hotelit në stadium dhe, kur pashë shiritin te garderoba ime, u befasova shumë”, shtoi tutje Seferi.

Në fund, ai pret një ftesë nga Panucci. “Kam parë fyerjet e maqedonasve pas këtij veprimi të bërë nga ana ime, por nuk më interesojnë ato, dua të eci përpara. Tashmë ëndrra ime është që të thirrem nga Panucci sa më shpejt, do të vë shpirtin në fushë me kombëtaren”.