Senegalezët në Zvicër bëjnë tifo për kombëtaren e Kosovës

"Sikur ky potencial të tubohej në një kombëtare të vetme, kombëtarja e Kosovës do të ishte „arrë e fortë“ edhe për Brazilin, Spanjën, Italinë e Gjermaninë"

Ata pak senegalezë që përcollën takimin miqësor ndërmjet Kosovës dhe Senegalit të zhvilluar në Gjenevë, në këtë vend të njohur  me shumëllojshmëri komunitetesh dhe kulturash, vlerësojnë pozitivisht angazhimin e lojtarëve të Kosovës.

Thiam Magueye një mërgimtar i hershëm nga Senegali, që jeton prej vitesh në Gjenevë,dhe që është profesor i matematikës e njëkohësisht edhe zëvendëskryetar i “FORUMIT PËR INTEGRIM DHE IMIGRACION” me seli në Bernë të Zvicrës, thotë: shumë njerëz  në vendet e Afrikës akoma nuk  dinë të vërtetën mbi Kosovën.

Shqiptarët  e Kosovës shumëkush ende i cilëson si jugosllavë. Pa e ditur që ata nuk kanë asnjë të përbashkët në gjuhë e kulturë me sllavët. E, kaluara e shqiptarëve të Kosovës është e prekshme e besa tepër e dhembshme. Nëpërmjet organizimeve të shumta ç’ bëhen këtu në Gjeneve dhe qytete tjera të Zvicrës, kam gjetur argumente të shumta që Serbia, me qëllim të kolonializmit të Kosovës ndaj shqiptarëve  bëri gjenocid të paparë. Ai çë është vërtetë njeri duhet të ndihet keq nga ajo çfarë  ka ngjarë atje.

Pasojat e luftës ende janë evidente dhe i vuajnë shumë shqiptarë.  Pas gjithë atyre përjetimeve Kosova me vetëm gjashtë vjet pavarësi po paralajmëron përparime të shpejta. Kur jemi te sporti e sidomos te futbolli Kosova me plot të drejtë mund të quhet gurrë e pashtershme e futbollit.

Gati gjysmën e kombëtares së Zvicrës e përbejnë shqiptarët e Kosovës. Rrallë ndodhë që ndonjë klub futbolli këtu në Zvicër të mos këtë të paktën dy-tre lojtar me origjinë nga Kosova. Me sa di edhe Albanie (është fjala për Shqipërinë)  nga Kosova furnizohet me futbollistët më  cilësor.  Sikur  të ishte e mundur që ky potencial të tubohej në një kombëtare të vetme kombëtarja e juaj do të ishte „arrë e fortë“ edhe për Brazilin, Spanjën, Italinë e Gjermaninë. Deri sa të realizohet  kjo ëndërr Kosova do të krijojë një skuadër stabile, e cila do t`u prezantojë ashtu si duhet kudo.
Kosova tani është në  provë, ajo po testohet për pranim zyrtar në Federatën Ndërkombëtare të Futbollit, prandaj humbja e djeshme apo edhe humbjet e ardhshme nuk duhet të ju demoralizojnë.

Kuptojeni që kombëtarja juaj është në fazën e formimit. Vendi im Senegali është pavarësuar më 1960 do te thotë mbi gjysmë shekulli shtet dhe krejt vonë ka mbërri të krijojë një kombëtare solide. Nga ata djem që i pashë dje në kombëtaren e Kosovës, shpejt mund të nxirren lojtarë të vërtetë. Të gjithë ishin të rinj dhe ambicioz.

Vitin që kaloi e kam vizituar Kosovën dhe nga atje kam mbresa të pashlyeshme. Shqiptarët e Kosovës ishin të dashur e posaçërisht mikpritës, gjë të cilën tek të tjerët rrallë e hasim. Të njëjtën ngrohtësi e shoh edhe tek shqiptarët e Gjenevës. Shpesh e vizitoi Universitetin Popullor Shqiptar të Gjenevës, dhe aty ndihem si në shtëpinë time. Duke qenë i sigurt që populli i Kosovës dhe ai i Senegalit kanë një të kaluar të dhimbshme dhe se rruga e këtyre dy popujve deri te bërja e shtetit ka qenë  tepër e mundimshme. Nga respekti për popullin tuaj paqedashës  dje unë dhe shumë bashkëvendës të mi kemi bërë tifozllëk për kombëtaren e Kosovës.

Mendoj që Federata Ndërkombëtare e Futbollit me seli në Cyrih të Zvicrës nuk duhet ta zvarris zyrtarizimin e pranimit të Kosovës në këtë familjeje. Kosova e meriton këtë! Kjo më së miri u pa në ndeshjen e fundit . Adhuruesit e kombëtares suaj krijuan atmosferë të vërtetë sportive. Nuk dua t`ua bëj qejfin por e keni një diasporë të mrekullueshme“.

Arif Ejupi, Gjenevë