Serbia anulon pjesëmarrjen e deputetëve të Kosovës

Kuvendi i Serbisë ka anuluar pjesëmarrjen e deputetëve të Kuvendit të Kosovës në një konferencë që i kishte ftuar vet.

Të ftuar në konferencën “Përmes idesë së BE-së drejt paqes dhe zhvillimit”, kanë qenë Vjosa Osmani, Blerta Deliu-Kodra dhe Ilir Deda, përcjell albinfo.ch.

Anulimi është bërë pas reagimit të të dënuarit për krime lufte, Vojslav Sheshel. Por, në letrën e anulimit të pjesëmarrjes, thuhet se kur u ftuan deputetët, ishte lëshim administrativ.

“Në ditën e Evropës, del fytyra anti-evropiane e udhëheqësisë së Serbisë. Veprimet e tilla janë në kundërshtim me deklarimet për “normalizim” të raporteve me Kosovën, dhe për “përkushtimin” ndaj rrugëtimit evropian të Ballkanit Perëndimor”, ka shkruar Deda në “Facebook”.

Edhe deputetja Blerta Deliu-Kodra ka thënë se vendimi i Kuvendit të Serbisë për të tërhequr ftesën për pjesëmarrje në Konferencën e organizuar nga Kryetari i Komisionit për Integrime i Kuvendit të Serbisë, Nenad Canak tregon qartë se pushteti serb nuk është i gatshëm të shkëputet nga e kaluara. “Duke iu nënshtruar presioneve dhe kërcënimeve të individëve të dënuar për krime lufte dhe gjenocid si Vojslav Shesheli, po dëshmohet qartë që persona të tillë përcaktojnë ende agjendat dhe janë faktor i politikbërjes së një shteti që po e negocion anëtarësimin në BE. Kosova si shtet, ka dëshmuar gjithmonë se është e orientuar kah fqinjësia e mirë”, ka shkruar ajo. Ndaj këtij vendimi ka reaguar edhe deputetja Vjosa Osmani.