Zgjedhje në Serbi, në Luginë pak votues

Nga ora 07:00 e mëngjesit janë hapur të gjitha vendvotimet në Serbi, ndërsa në Bujanoc, Preshevë e Medvegjë, po vërehet numër i vogël i votuesve

Rreth 6.7 milionë qytetarë të Serbisë po votojnë sot për zgjedhjet lokale dhe ato Parlamentare, përfshirë këtu edhe shqiptarët e tri komunave të Luginës së Preshevës. Sipas burimeve të Albinfo.Ch, nga ora 07:00 e mëngjesit janë hapur të gjitha vendvotimet, ndërsa në Bujanoc, Preshevë e Medvegjë, po vërehet një numër i vogël i votuesve.

Zgjedhjet për Parlament të Serbisë, po mbahen edhe në Kosovë, dhe sipas medieve lokale, procesi me ndihmën e OSBE-së po zhvillohet normalisht.

Zeqirja Miftari, kryetar i Komisionit Komunal Zgjedhorë në Preshevë tha se në këtë komunë, janë hapur të gjithë vendvotime gjithsejtë  38 dhe të drejtë vote kanë 37474 votues.

Ndërsa për komunën e Bujanocit, kryetari i Komisionit Komunal Zgjedhorë, Fejzi Beqiri ka thënë se vendvotime janë hapur dhe procesi po shkon mirë, raporton portali rajonal titulli.com. Sipas Beqirit, numri i përgjithshëm i votuesve në komunën e Bujanocit është 42.288 qytetarë.

Në këto zgjedhje shqiptarët kanë hyrë të ndarë dhe me disa lista zgjedhore. Derisa në Preshevë ka një shumicë absolute të shqiptarëve mbi 97 për qind, në Bujanoc është pak më e përzier struktura etnike, ka rreth 60 për qind shqiptarë dhe 40 për qind serbë dhe romë. Në Medvegjë shqiptarët kanë mbetur pakicë.

Por, e veçanta e këtyre zgjedhjeve është se mijëra shqiptarë të lindur në Luginë të Preshevës nuk do të kenë të drejtën e votës, në pamundësi për t’u pajisur me letërnjoftime. Shqiptarët janë shtyrë nga evidenca civile dhe po bëhet pasivizimi i vendbanimeve, duke iu mohuar kështu dhe e drejta e votës.

Nagip Arifi, kryetar i Komunës së Bujanocit, ka thënë për “Zërin” se pasivizimi i vendbanimeve të personave me të drejtë vote ka filluar si procedurë nga Republika e Serbisë, duke pasivizuar sidomos shqiptarët që jetojnë në Malësinë e Bujanocit dhe atë të Karadakut në Preshevë.

Arifi sqaron se sipas evidencës që posedojnë, në Bujanoc janë pasivizuar diku 300 persona me të drejtë vote, ka thënë ai për Zëri. Por, prapëseprapë ai thotë se numri i shqiptarëve që kanë të drejtë vote në këtë komunën e Bujanocit, veçanërisht është më i madh se i serbëve.

Ndryshe, sot për t’i zgjedhur përfaqësuesit e tyre, kanë të drejt sot rreth 6.739.441 qytetarë të Serbisë në 8.378 vendvotime. Për 250 ulëse në Kuvendin e Serbisë, kanë kandiduar 3.270 kandidat nga 20 lista zgjedhore e partiake.

Ndërsa zgjedhjet lokale po mbahen në Beograd (që ka 17 komuna) dhe në 25 qytetet të tjera, që kanë gjithsejtë 138 komuna.