Sërish dështon seanca konstituive në mungesë të PAN-it

Me gjithë këtë kryesuesi i seancës Adem Mikullovci  ka lejuar debat parlamentar. Por ai ka paralajmëruar se do të thërras një takim konsultativ me koalicionin PAN të mërkurën

Në mungesë të kuorumit për shkak të mungesës së deputetëve të koalicionit PAN dhe minoriteteve ka dështuar konstituimi i Kuvendit të Kosovës. Me gjithë këtë kryesuesi i seancës Adem Mikullovci  ka lejuar debat parlamentar. Por ai ka paralajmëruar se do të thërras një takim konsultativ me koalicionin PAN të mërkurën, transmeton albinfo.ch.

Ai tha se në këtë takim do të shkoj vetëm me një pikë të rendit të ditës që t’i pyes se kur janë të gatshëm të vijnë në seancë dhe ta propozojnë kandidatin për kryetar.  Ndërsa shefi i grupit parlamentar të Lëvizjes Vetëvendosje, Glauk Konjufca theksoi se PAN po e bojkotojnë themelimin e institucioneve duke mos u shfaqur në Kuvend, për shkak se siç tha ai nuk i kanë numrat. Sipas tij, një gjë është e sigurt, Qeveria e Kosovës ose do t’i ketë 81 vota me në krye VV ose do t’i ketë 59 vota me në krye PDK-në.

Konjufca tha se nëse PAN nuk ka kandidat tjetër pos Veselit le të vijnë dhe ta qesin në votim dhe ata do të marrin pjesë në votim e po ashtu propozoi që seanca t’ua zë vendin tryezave të cilat po i kërkon PAN-i. Ndërsa shefi i grupit parlamentar të LDK-së, Avdullah Hoti, ka propozuar një tryezë me partitë politike që të diskutojnë se si t’i drejtohen Gjykatës Kushtetuese në lidhje me zhbllokimin e punës së Kuvendit.

“Bllokues janë koalicioni PAN dhe kjo po dihet. Përshëndes deklaratën e ambasadorëve. Kjo situatë nuk mund të vazhdojë me tutje, dhe ne po shqyrtojmë hapat kushtetues dhe jemi duke punuar me sqarimin e  bazës juridike”, ka thënë Hoti. Ndërsa deputetja nga radhët e koalicionit LAA, Mimoza Kusari-Lila deklaroi se kriza politike po i kushton Kosovës me humbje të mëdha. Ajo tha se nëse vazhdohet kështu ekziston mundësia e mbajtjes së zgjedhjeve tjera të jashtëzakonshme.

Një propozim konkret ka paraqitur edhe deputeti i LAA-së, Arben Gashi por kryesuesi ka thënë se nuk mund të vazhdohet pasi ai bie ndesh me rregulloren e punës së Kuvendit.