Shaip Kamberi refuzon të marrë pjesë në konsultimet për qeverinë e re serbe

Shaip Kamberi, FB

Deputeti i vetëm shqiptar në Parlamentin e Serbisë, Shaip Kamberi, i ka drejtuar një letër Presidentit serb, Aleksandar Vuçiq, duke e informuar se nuk do të marrë pjesë në konsultimet për formimin e qeverisë së re.

Në letrën e tij, Kamberi ka deklaruar se refuzimi i tij vjen si pasojë e diskriminimit të vazhdueshëm ndaj shqiptarëve në Serbi dhe mungesës së vullnetit politik për të përmirësuar pozitën e tyre, transmeton albinfo.ch.

“Nuk shoh të arsyeshme të bëhem pjesë e një procesi të rremë të demokracisë, sa për të përmbushur formën, ndërkohë që bashkëkombasit e mi mbeten një pakicë e diskriminuar në sistemin shtetëror gjatë 13 viteve të fundit”, ka shkruar Kamberi, duke publikuar edhe letrën e plotë.

Ai ka theksuar se shqiptarët në Serbi vazhdojnë të përballen me probleme të shumta, përfshirë pasivizimin e adresave, mosnjohjen e diplomave të fituara në Kosovë, mungesën e përfaqësimit në institucionet publike dhe diskriminimin ekonomik, përcjell albinfo.ch.

Kamberi ka rikujtuar se, që nga viti 2014, kërkesat e shqiptarëve janë bazuar në “Planin me shtatë pika”, një dokument i hartuar nga subjektet politike shqiptare dhe i miratuar nga Qeveria serbe në vitin 2013. Sipas tij, pavarësisht premtimeve dhe përpjekjeve institucionale, asnjë qeveri e drejtuar nga Vuçiq nuk ka bërë përpjekje serioze për t’i realizuar këto kërkesa.

Problemet kryesore të komunitetit shqiptar në Serbi

Në letrën e tij, Kamberi ka renditur disa nga problemet kryesore me të cilat përballen shqiptarët në Preshevë, Bujanoc dhe Medvegjë:

• Pasivizimi i adresave të shqiptarëve vazhdon.

• Mosnjohja e diplomave të fituara në Kosovë pengon punësimin e të rinjve.

• Shqiptarët vazhdojnë të përjashtohen nga institucionet publike.

• Gjuha e urrejtjes ndaj shqiptarëve mbetet e pranishme në diskursin politik.

• Zonat me shumicë shqiptare janë ndër më të pazhvilluarat në Serbi.

• Mjekët dhe kuadrot shqiptare të specializuara në polici mbeten të papunë.

Duke përmbyllur letrën e tij, Kamberi ka bërë thirrje për një qasje të re në politikën serbe, e cila do të përfshinte lirinë e plotë të medias, respektimin e të drejtave të njeriut dhe të pakicave kombëtare.

“Jam i hapur për bisedime dhe bashkëpunim me këdo që, në mënyrë serioze dhe të sinqertë, do të angazhohet për realizimin e kërkesave tona legjitime”, ka përfunduar ai.

Ky vendim i Kamberit për të bojkotuar konsultimet vjen në një kohë kur Serbia po përballet me një krizë politike dhe tensione të brendshme lidhur me qeverisjen e ardhshme të vendit.