Shaqiri dhuron fanellën për tifozin me aftësi të kufizuara

Pas ndeshjes Shaqiri ka shkuar për ta takuar Evin, duke e hequr fanellën e tij dhe duke ia dhuruar e duke e përqafuar atë

Xherdan Shaqiri ka përjetuar një nga ndeshjet më emocionuese në karrierën e tij, pasi pritja që i është bërë në Kosovë ka qenë fantastike.

Shaqiri u duartrokit në fillim të ndeshjes, por edhe në momentin e zëvendësimit të tij, i gjithë stadiumi u ngrit në këmbë për ta duartrokitur gjilanasin, i cili gjithmonë ka treguar dashurinë për Kosovën, duke e reprezentues në mënyrën më të mirë të mundshme kudo që ka luajtur.

31-vjeçari ka bërë një gjest fantastik pas përfundimit të ndeshjes, duke i dhuruar fanellën e tij një tifozi me aftësi të kufizuara, shkruajnë mediat vendore, përcjell albinfo.ch.

Evi është një i ri nga Gjilani, i cili është tifoz i madh i Dritës dhe Kosovës, pasi nuk mungon në asnjë ndeshje ku luan klubi bardhekaltër dhe Përfaqësuesja dardane.

Pas ndeshjes Shaqiri ka shkuar për ta takuar Evin, duke e hequr fanellën e tij dhe duke ia dhuruar e duke e përqafuar atë.

Ka qenë një moment shumë emocionues, derisa Shaqiri ka marrë edhe njëherë duartrokitje për gjestin e bërë, duke gëzuar Evin me një dhuratë të bukur.

---