Shaqiri kujton golin me gërshërë

“Unë kam marr shumë video me fëmijë që mundohen të shënojnë me gërshërë. Kam marrë urime nga kudo”, theksoi futbollisti shqiptar

Xherdan Shaqiri edhe një herë ka kujtuar golin me gërshërë që shënoi ndaj Polonisë. Ky gol u vlerësua nga UEFA, si më i miri, derisa tifozët e kishin zgjedhur të Zoltan Geras, shkruan albinfo.ch.

Ai në një intervistë për “Blick”, ka folur për super golin ndaj Polonisë. “Gjithkush e di se ishte goli më i miri, por ky nuk ishte qëllimi im. Ndoshta kanë votuar të gjithë hungarezët. Unë nuk kam nevojë të marr ndonjë çmim”, ka thënë Shaqiri, duke shtuar: “Unë kam marr shumë video me fëmijë që mundohen të shënojnë me gërshërë. Kam marrë urime nga kudo”, theksoi futbollisti shqiptar.

Ai pyetet nëse ndonjë fëmijë është pagëzuar me emrin e tij. “Jo, kjo nuk ka ndodhur. Ndoshta po të kishim shkuar më larg në Kampionatin Evropian. Nuk njoh dikë tjetër në Zvicër me emrin Xherdan”.

24-vjeçari pas ndeshjes Francë-Zvicër kishte thënë se shpreson që Puma të mos prodhojë prezevantiv, pasi ishin shqyer shumë fanella. “Po, ishte diçka spontane”. Ai ka shtuar se ka parë edhe disa ndeshje pas eliminimit të Zvicrës. “Kam parë disa, por jo të gjitha. Gjysmëfinalet dhe finalen. Në Spanjë dhe në Shqipëri kam parë ndeshjet në TV. Unë kam qenë i mërzitur që Zvicra nuk u kualifikua më tutje dhe isha pak xheloz kur pashë Portugalinë, kampione të Evropës, nuk më bindën shumë”, theksoi futbollisti i lindur në Zhegër të Gjilanit.

Për Shaqirin thuhet se po e kërkon Borussia Dortmund. “Mua nuk më ka kontaktuar askush dhe nuk mund të them më shumë. Unë ende jam në pushime. Në këtë moment rikthimi në Bundesligë është i vështirë. Unë jam i përqendruar te Stoke, ku do të rikthehem më 24 shkurt. Shpresoj se do të kemi një edicion edhe më të mirë dhe të shënojë më shumë gola”, përfundoi Xherdan Shaqiri.