Shaqirin e priti vetëm trajneri

Xherdan Shaqiri në një intervistë për ‘Tages Woche’ ka zbuluar një detaj shumë interesant, kur u transferua në Stoke City nga Interi, shkruan albinfo.ch.

Derisa kur kaloi në Inter e kishin pritur rreth 400 tifozë, duke bllokuar aeroportin e Milanos, në Stoke e priti vetëm trajneri Mark Hughes.

“Nuk kishte tifozë duke më pritur në aeroport, siç kishte në Milano. Nga ana tjetër, ishte një ndjenjë e madhe kur pashë se çfarë bëri klubi për mua. Në aeroport ishte trajneri Mark Hughes, që më mori nga aty dhe ishte një gjest i mirë, që nuk mendoj se shumë trajnerë do ta bënin”, u shpreh Shaqiri, i cili është adaptuar mjaft mirë në skuadrën angleze, për dallim nga Interi, ku u largua pas vetëm gjashtë muajsh.