SHBA e përsërit Asociacionin si kusht për anëtarësimin e Kosovës në Këshillin e Evropës

Ndihmëssekretari amerikan i Shtetit për Evropë dhe Euroazi, James O’Brien, ka folur sot për mundësinë e anëtarësimit të Kosovës në Këshillin e Evropës ndërsa e ka përmendur progresin e Kosovës me zbatimin e vendimit të Gjykatës Kushtetuese për Manastirin e Deçanit.

Përmes një konference online të zhvilluar sot, O’brien ka përsëritur se nuk ëshë tërhequr kushti për themelimin e Asociacionit, transmeton albinfo.ch.

“Zbatimi i vendimit për Manastirin e Deçanit ishte një progres i mirë dhe ne në mënyrë publike i kemi përshëndetur hapat që qeveria ka ndërmarrë. Por kjo ka ndodhur dhe raportuesja (Dora Bakoyannis) ka thënë se Kosova duhet të ecë përpara me çështjen e Asociacionit para se të vihet në votim çështja e Kosovës. Raportuesja e ka bërë të qartë që implementimi i Asociacionit duhet të bëhet”, ka thënë ai.

Tutje, i dërguari i Shteteve të Bashkuara të Amerikës për Ballkanin Perëndimor, Gabriel Escobar, para disa ditëve ka thënë se Kosova është e kushtëzuar me themelimin e Asociacionit të Komunave me Shumicë Serbe për anëtarësimin në Këshillin e Evropës.